 |
| بھیانک ترین تاریخی وبائیں |
کورونا وائرس نے دنیا بھر میں خوف ایک کی لہر دوڑا رکھی ہے، لیکن اس کے باوجود جتنے بھی شواہد ہیں انن سے معلوم ہوتا ہے کہ یہ وائرس اتنا بھی خطرناک نہیں ہے جتنا بڑا اس کا خوف ہے۔ تاریخ میں آنے والی وبائیں اس سے کہیں زیادہ بھیانک رہیں تھیں۔
تاریخ سے ہمیں پتا چلتا ہے کہ ماضی میں کئی بار ایسا ہو چکا ہے کہ خوفناک وباؤں نے ایک بڑے پیمانے پر انسانی آبادی کو درہم برہم کرکے رکھ دیا تھا اور ان کے مقابلے پر موجودہ کورونا وائرس کی وبا کی کوئی حیثیت نہیں ہے۔
یہاں ہم ماضی میں پھیلنے والی دس ایسی ہولناک ترین وباؤں کا ذکر کر یں گے جنہوں نے اس دنیا کے بڑے حصوں کو تہس نہس کر کے رکھ دیا تھا۔ سب سے ہلکی وبا پہلے اور سب سے خوفناک آخر میں آپ کو بتائیں گے۔
10 – نیند کی وبا
کل ہلاکتیں: 15 لاکھ
1915 سے 1926 تک اٹھنے والی اس وبا کا باعث ایک جرثومہ تھا جو دماغ کے اندر جا کر حملہ کرتا ہے، اس بیماری کو گردن توڑ بخار کی ایک شکل سمجھا جا سکتا ہے اور اس کے مریض پر شدید غنودگی طاری ہو جاتی ہے، مرض کی شدت میں مریض بت کا بت بنا رہ جاتا ہے اور ہل جُل بھی نہیں سکتا.
9 – ایشیائی فلو
ہلاکتیں: 20 لاکھ
1957 سے 1958 چین ہی سے ایک فلو اٹھا جس نے دیکھتے ہی دیکھتے دنیا بھر کو اپنی لپیٹ میں لے لیا۔ بعض ماہرین کے مطابق اس کا وائرس بطخوں سے انسانوں میں منتقل ہوا تھا۔ اس وبا سے 20 لاکھ کے قریب لوگ مارے گئے، جن میں صرف امریکا میں 70 ہزار ہلاکتیں شامل ہیں۔
8 – ایرانی طاعون
ہلاکتیں: 20 لاکھ سے بھی زیادہ
ویسے تو طاعون کی بیماری وقتاً فوفتاً سر اٹھاتی رہی ہے، لیکن سن 1772 میں ایران میں ایک ہیبت ناک وبا پھوٹ پڑی تھی۔ اس زمانے میں اس موذی مرض کا کوئی علاج نہیں تھا جس کی وجہ سے اس نے پورے ملک کو اپنے لپیٹ میں لے لیا۔
7- کوکولزتلی 2#
ہلاکتیں: 20 لاکھ سے تقریباً 25 لاکھ
جب ہسپانوی مہم جوؤں نے براعظم امریکا پر دھاوا بولا تھا تو اس سے انسانی تاریخ کے ایک ہولناک المیے نے جنم لیاتھا ۔ آبادی کے جسموں میں یورپی جراثیم کے خلاف کسی قسم کی مدافعت موجود نہیں تھی، اس لیے ان کی بستیوں کی بستیاں تاراج ہو گئیں۔
ایک واقعہ 1576 سے 1580 کے دوران میکسیکو میں پیش آیا جس میں 20 لاکھ سے 25 لاکھ افراد اس کا لقمۂ بن گئے۔ یہ واضح نہیں ہے کہ اصل بیماری کیا تھی، لیکن مریضوں کو تیز بخار ہوتا تھا، اور بدن کے مختلف حصوں سے خون جاری ہو جاتا تھا۔
6 – انتونین کی وبا
ہلاکتیں: 50 لاکھ سے تقریباً ایک کروڑ
یہ دہشت ناک مرض اس وقت پھیلا تھا جب رومی سلطنت اپنے عروج پر رہی تھی۔ 165 عیسوی سے 180 عیسوی تک جاری رہنے والی اس وبا نے یورپ کے بڑے حصے کو تہہ و بالا کر کے رکھ دیا۔ مشہور حکیم جالینوس اسی دور میں گزرا ہے اور اس نے مرض کی تفصیلات بیان کی، تاہم یہ واضح نہیں ہو سکا کہ یہ مرض کون سا تھا، اور اس سلسلے میں خسرہ اور چیچک دونوں کا نام لیا جاتا ہے۔
5 – کوکولزتلی 1#
یہ وبا بھی میکسیکو میں آئی تھی، لیکن کوکولزتلی 2 سے تقریباً 30 برس پہلے، اور اس کی وجہ بھی وہی تھی یعنی براعظم امریکا کے مقامی باشندوں میں یورپی جراثیم کے خلاف عدم مدافعت۔ لیکن اس وبا نے دوسری کے مقابلے پر کہیں زیادہ قیامت ڈھائی اور 50 لاکھ سے ڈیڑھ کروڑ لوگوں کو موت کی نیند سلا دیا۔
یہ اعداد و شمار اس لحاظ سے بےحد لرزہ خیز ہیں کہ اس وقت آبادی آج کے مقابلے پر بہت کم تھی اور تصور کیا جا سکتا ہے کہ اس نے کیسے پورے ملک کو بنجر بنا کر رکھ دیا ہو گا۔
4 – جسٹینن طاعون
ہلاکتیں: ڈھائی کروڑ تک
541 سے 542 میں آنے والی یہ وبا طاعون کی پہلی بڑی مثال ہے۔ اس وبا نے دو سال کے اندر اندر بازنطینی سلطنت اور اس سے ملحقہ ساسانی سلطنتوں کو سیلاب کی طرح لپیٹ میں لے لیا۔ اس وبا کا اثر اس قدر شدید رہا تھا کہ ماہرین کے مطابق اس نے تاریخ کا دھارا ہی بدل کر رکھ دیاتھا ۔ کہا جاتا ہے کہ اس وبا نے ان سلطنتوں کو اتنا کمزور کر دیا تھا کہ چند عشروں بعد عرب بڑی آسانی سے دونوں کو الٹنے میں کامیاب ہو گئے۔
3- ایڈز/ایچ آئی وی
ہلاکتیں: تین کروڑ
ایڈز نئی بیماری ہے جس کا وائرس مغربی افریقہ میں چمپینزیوں سے انسان میں منتقل ہوا اور پھر وہاں سے بقیہ دنیا میں پھیل گیا۔ اس بیماری نے سب سے زیادہ افریقہ کو متاثر کیا ہے اور حالیہ برسوں میں دنیا بھر میں ہونے والے 60 فیصد سے زیادہ مریضوں کا تعلق زیرِ صحارا افریقہ سے ہے۔
2 – ہسپانوی فلو
ہلاکتیں: دس کروڑ
یہ وبا اس وقت پھیلی تھی جب دنیا ابھی ابھی پہلی عالمی جنگ کی تباہی کے ملبے تلے دبی ہوئی تھی یعنی 1918 سے 1920۔ اس وقت دنیا کی آبادی پونے دو ارب کے قریب تھی، جب کہ ہسپانوی فلو نے تقریباً ہر چوتھے شخص کو متاثر کیا۔
اس وقت جنگ کی صورتِ حال کی وجہ سے یورپ کے بیشتر حصوں میں اس فلو سے ہونے والی ہلاکتوں کو چھپایا گیا، جب کہ اسپین چونکہ جنگ میں شامل نہیں تھا اور وہاں سے بڑی ہلاکتوں کی خبریں آنے کے بعد یہ تاثر ملا جیسے اس بیماری نے خاص طور پر اسپین کو ہدف بنایا ہے۔
عام طور پر فلو بچوں اور بوڑھوں کے لیے زیادہ مہلک ثابت ہوتا ہے، لیکن ہسپانوی فلو نے جوانوں کو خاص طور پر ہلاک کیا۔
1 – سیاہ موت
ہلاکتیں: ساڑھے سات کروڑ سے 20 کروڑ تک
انسانی تاریخ کبھی اتنے بڑے سانحے سے نہیں گزری۔ 1347 تا 1351 تک طاعون کی اس وبا نے دنیا کو اس قدر متاثر کیا کہ کہا جاتا ہے کہ اگر یہ وبا نہ آئی ہوتی تو آج دنیا کا نقشہ کچھ اور ہوتا۔
ماہرین کے مطابق طاعون کا جرثومہ مشرقی ایشیا سے ہوتا ہوا تجارتی راستوں کے ذریعے مشرقِ وسطیٰ اور پھر یورپ جا پہنچا جہاں وہ 30 فیصد سے 60 فیصد آبادی کو موت کے منہ میں لے گیا۔ تباہی اس قدر بھیانک تھی کہ پورے شہر میں مُردوں کو دفنانے والا کوئی نہیں بچا۔
اس وبا کے اثرات کی وجہ سے تاریخ میں پہلی بار دنیا کی مجموعی آبادی کم ہو گئی اور دوبارہ آبادی کی اس سطح تک پہنچنے کے لیے دنیا کو دو سو سال لگ گئے۔
بونس: 21ویں صدی کی سب سے مہلک وبا
2013 تا 2016 مغربی افریقہ میں پھیلنے والے ایبولا وائرس سے 11300 افراد ہلاک ہو گئے تھے، اور اس طرح یہ رواں صدی کی اب تک کی سب سے مہلک وبا ہے۔
اور ورلڈ میڑ کی رپورٹ کے مطابق اب کرونا وائرس جو چین سے ہوتا کافی ممالک میں پھیل رہا ہے جس کے کیسس تقریباً اب تک 1,203,058 اموات، 64,743، صحتیابی 246,703 کو ملی ہے
اے اوپر والے ہمیں ایسی بیماریوں سے بچا اور اپنے حفظ و امان میں رکھ آمین.
